LUNCH ACTUALLY (三)

上文講到第一次配對中LUNCH ACTUALLY嘅表現好差，打咗電話嚟約時間，但最後冇任何回覆，就喺咁第一次配對冇聲冇色咁夭折咗。喺我打電話去追問嘅時候，LA表示即刻幫我做另一個配對，好，人有錯手馬有失蹄，唯有等另一次。

轉過頭LA果然打返電話嚟，都好喇總算做返啲嘢，了解咗另一個男士，其實睇唔到有邊一方便MATCH，不過唔緊要，可能性格夾呱，都見咗面食個飯了解過先知嘅，又比咗日期時間職員約，約咗成個星期終於約到一星期後見面。就係見面前兩日收到LA短訊指男方病咗要改期，無辦法喇，病係預計唔到嘅，之後改咗三星期後見，希望唔好再有波折嘞。

約會前兩日，收到LA嘅短訊提醒你約會嘅日期時間地點，訂咗邊間餐廳，如要改期或取消要盡快聯絡LA等等，你要覆返LA確定你能出席約會。由參加LA到嗰刻第一個DATE足足等咗兩個月，我好快就覆咗SMS，準備定件靚衫等食飯。

約會當日，一早化好妝換好衫提早去到餐廳附近嘅商場閒逛，避免塞車遲到搞到第一印象唔好嘛。五分鐘前，戰戰兢兢行到餐廳嘅門前，望咗一望入面有咩單身男士自己坐一張枱，答案係唔見，可能我早過佢呱，打算入去坐低先，所以同接待嘅侍應話訂咗枱，餐廳表示冇訂到枱，搞咗一輪佢哋話安排張枱我坐低先，心諗又搞乜。由於LA星期日係冇人返工嘅，約會嗰日就係星期日，想打電話去問都問唔到，咁我就唯有乖乖哋坐喺張望住門口嘅枱喇，以防男方嚟到又搵唔到訂枱資料，坐咗另一張枱或者走咗。結果哩，又係等了又等嘞，半個鐘冇單身嘅男士入過餐廳，而我嘅耐性已經用完喇，我Send咗個短訊去LA原先confirm我出席約會嘅電話號碼碰下運氣，幾分鐘後收到LA嘅電話，職員話打去比男方了解下先，至於冇訂枱嘅問題佢要第二日問返有關職員先覆到我。咁我又等喇，五分鐘後收到LA回覆，原來男方根本唔喺香港，亦都唔會出席到今次嘅約會，佢話要星期一返工同另一位同事了解下再比個答覆我。

非常之好，我等左五十分鐘之後，就一個人食咗個海鮮西班牙飯埋單。我唔介意男方唔得閒，問題係LA明明兩日前要會員回覆出唔出席到約會，如果LA收唔到回覆就應該跟進或者回覆我約會取消，而唔係做啲門面嘢但實質乜都冇做過，連枱都冇訂到，我想問我比嗰五位數字買LUNCH ACTUALLY嘅服務做乜，LA所謂嘅專業係指乜嘢?

最諷刺係第二日，職員覆返我話唔好意思，佢哋安排得唔好（我想話佢哋係冇安排過），職員話以示歉意問我拎咗個地址話寄返張咭比我，事後我究竟收到一張THANK YOU CARD，天啊，THANK什麼YOU，我已經對LUNCH ACTUALLY冇哂期望。

你仲想問我LUNCH ACTUALLY得唔得，好唔好啊？我可以話你知絕對唔值得駛一分一毫喺哩間所謂專業極速約會公司身上。你以為故事完哩？仲有下文啊。。。

LUNCH ACTUALLY (二)

參加咗LA之後，自然好想快啲收到通知有約會安排嘅資料，可惜你會感到等了又等嘅感覺，期間你會收到好多LA發出嘅＂資訊＂電郵，包括第一次約會要點做，DO & DON'T，一啲小統計分析，總之唔係我想收到嘅嘢。

兩星期後，終於收到短訊話有一個合適嘅會員，男方了解過我嘅資料覺得ok, 咁我又問吓對方嘅資料了解吓，無問題喎，又係我鐘意嘅運動型會玩吓唔同活動，啱哂我鍾意出戶外玩，上山下海旅行等等。心諗果然係有配對過，之後比咗幾個日期職員，佢哋話問埋男方邊日可以約出嚟食飯就覆我，咁我就等佢覆嘞。等下一日，等下又一日，最後我話有空食飯嘅兩星期日子已經過去嘞，結果係我冇收到任何電話／電郵／短訊通知喎，咁究竟有冇約到哩，係嗰兩星期佢都唔得閒定點哩，如果唔得閒點解冇職員打返電話比我夾其他日子哩。

我打返電話上LA問究竟咩情況喇，始終睇到男方Profile好似幾適合自己，問一問唔好錯過機會吖，如果時間唔啱可以再夾啫。點知職員話男方哩一兩個月都唔喺香港，要我再等下一個配對喎。即係咁，LA係問咗佢OK先再問我約時間，點解佢唔喺香港一兩個月LA都仲問我同佢配對哩，再者我唔介意佢唔得閒／唔喺香港／抑或係LA出錯都好（其實好大機會係LA配咗另一個女仔比佢，因為LA一般會比一兩個月＂一個配對＂發展），點都好LA都應該覆返我唔好影都冇吖，LA就話唔好意思，即刻同我配另一個，叫我等回覆。好，我又等。。。

LUNCH ACTUALLY (一)

有一日打開本舊雜誌，見到官恩娜透過極速約會識咗個醫生男友，即刻睇吓係邊間公司喇，隨即上網睇吓間公司嘅資料先，不竟關係將來嘅幸福，金錢損失事小，啲個人資料唔知比咗咩人事大。經過一輪資料搜集，睇咗好多評語，好評好似都唔少，當然有意見話麻麻哋，但人總係主觀嘅，心諗可能咁啱嗰幾位朋友唔好彩或者緣份未到啫，心入面其實已經比官恩娜嘅成功個案吸引咗，有了一試無妨嘅心態，就係咁我就留咗資料喺LA，等佢哋聯絡我約時間見面。

講到哩到好多朋友都好好奇究竟Speed Dating好唔好，LUNCH ACTUALLY得唔得，會員質素如何等等。。。有睇過佢網頁嘅朋友都應該留意到佢哋以高質嘅會員，專業嘅配對系統定位。一早上網已經睇咗佢哋收費唔平（喺巿場上應該叫做偏貴），亦聽聞唔係肯比錢就會比你入會做配對，但咁反而覺得好，有門檻即係對會員有要求，質素唔會咁參差，收費高即係代表有一定能力嘅人士先會揀間公司，唔心諗與其周圍撞運氣試唔同公司，不如揀間像樣少少成功機會大啲嘅，而哩個blog亦因為故事嘅發展而誕生，過程你估都估唔到。

*********************************

留咗資料第二日，LA有職員打電話比我約時間上佢哋公司見面，打鐵趁熱，過兩日我已經抽時間上咗去。一去到LA中環寫字樓，第一個感覺係＂都幾簡潔＂，兩三個職員，幾間房，每間房都係兩三張小梳化加張coffee table，枱上放咗一疊LA喺雜誌上嘅報道 / 廣告 / 書等等，不竟佢哋賣嘅係服務，心諗只要佢哋做到正確嘅配對及安排到流暢嘅約會，其實花巧嘅門面嘢等等對我嚟講唔重要。

職員招呼我坐低咗，放低一杯水叫我等咗陣，轉頭就有另一個職員嚟同我傾計攞少少個人資料，問題大約問下你背景，性格，對選擇另一半嘅要求等等，跟住佢會離開房間話做少少分析，五分鐘之後入返嚟話有適合我嘅會員可以做配對，最後當然講吓個配對PLAN係點計法喇，有分三次／五次配對，視乎各人需要而定，揀咗適合你嘅計劃，比咗錢後影兩張相拍一段短片，填一份問卷就可以走得，等佢哋有合適嘅安排就會聯絡你。

前文

話說之前我同拍咗N年拖嘅前度分手，心情低落咗好耐，錯過好多光陰，突然一刻醒覺“I Deserve Better”，之後收拾心情重新出發。但礙於工作繁忙，又唔想同公司嘅同事發展，考慮Speed Dating都係一個唔錯嘅方案，就係咁我開始留意有關極速約會公司嘅資訊。